Loftmynd af Kópavogi um 1964 tekin af Ólafi Jónssyni loftsiglingafræðingi.
Kópavogsdagar verða haldnir 7.-14. maí 2011.
Miðvikudaginn 11. maí kl. 17.15 mun Héraðsskjalasafn Kópavogs standa fyrir málstofu um sögu Kópavogs í Kórnum í Bókasafni Kópavogs.
Fyrirlesarar verða Björn Þorsteinsson, Gunnar Marel Hinriksson og Guðlaugur R. Guðmundsson. Björn vinnur að ritun sögu síðustu 30 ára í Kópavogi, Guðlaugur fjallar um örnefni í landi Kópavogsbæjar og væntanlegt rit þar að lútandi og Gunnar mun fjalla um byggð í landi Kópavogs fyrr á tímum, sérstaklega út frá kvikfjártalinu 1703.
Þriðjudaginn 10. maí og fram til laugardagsins 14. maí verður opin í anddyri Náttúrufræðistofu Kópavogs sýning á vegum Héraðsskjalasafns Kópavogs á loftmyndum af Kársnesi teknar á mismunandi tímum. Sýna þær hvernig nesið hefur breyst og þróast á umliðnum árum, hvort tveggja með aukinni byggð og landfyllingum.
Fjölmargt annað er á dagskrá Kópavogsdaga menningarlegs eðlis og verður m.a. haldið upp á merkisafmæli ýmissa stofnana bæjarins í ár, Leikskólinn Marbakki verður 25 ára, Salaskóli verður 10 ára og Kvöldskóli Kópavogs (áður Námsflokkar Kópavogs) verður 40 ára. Í Salnum verða endurteknir tónleikar í tilefni af níræðisafmæli Jóns Múla Árnasonar.
Nánar má glöggva sig á dagskrá Kópavogsdaga á heimasíðu þeirra: